Арцемій, архіепіскап Гродзенскі і Ваўкавыскі

(свецкае імя Аляксандр Анатолевіч Кішчанка)

Нарадзіўся 25 красавіка 1952 г. у г. Мінску. Пасля заканчэння сярэдняй школы ў 1969 г. паступіў у Беларускі інстытут механізацыі і электрыфікацыі сельскай гаспадаркі, скончыў 3 курсы. Пасля службы ў радах Савецкай Арміі (1975-1976) быў паслушнікам Пскова-Пячэрскага манастыра.

У 1976 г. паступіў у Ленінградскую духоўную семінарыю.

8 кастрычніка 1978 г. у храме святога апостала і евангеліста Іаана Багаслова Ленінградскай духоўнай акадэміі Высокапраасвяшчэнным Кірылам, архіепіскапам Выбаргскім, рэктарам Ленінградскіх духоўных акадэміі і семінарыі пастрыжаны ў чытальніка.

У 1979 г. залічаны ў Ленінградскую духоўную акадэмію.

7 лютага 1982 г. рэзалюцыяй мітрапаліта Ленінградскага і Наўгародскага Антонія (Мельнікава) прызначаны псаломшчыкам Успенскай царквы г. Аланца Карэльскай АССР.

21 лютага 1982 г. мітрапалітам Ленінградскім і Наўгародскім Антоніем пасвячаны ў дыякана ў стане цэлібату і прызначаны на служэнне ў Успенскай царкве г. Аланца Карэльскай АССР.

28 верасня 1982 г. старшынёй Вучэбнага камітэта пры Свяшчэнным Сінодзе Мітрапалітам Талінским і Эстонскім Аляксіем накіраваны ў распараджэнне Высокапраасвяшчэннага Філарэта, Мітрапаліта Мінскага і Беларускага, Патрыяршага Экзарха Заходняй Еўропы, для праходжання царкоўна-прыхадскога служэння.

1 кастрычніка 1982 г. указам уладыкі Філарэта, Мітрапаліта Мінскага і Беларускага, Патрыяршага Экзарха Заходняй Еўропы, прыняты ў клір Мінска-Беларускай епархіі і прызначаны на пасаду дыякана Свята-Аляксандра-Неўскай царквы г. Мінска.

24 сакавіка 1984 г. Высокапраасвяшчэнным Мітрапалітам Мінскім і Беларускім Філарэтам, Патрыяршым Экзархам Заходняй Еўропы, рукапаложаны ў іерэя і прызначаны на пасаду святара Свята-Аляксандра-Неўскай царквы г. Мінска.

18 красавіка 1993 г. Высокапраасвяшчэнным Мітрапалітам Мінскім і Слуцкім, Патрыяршым Экзархам усяе Беларусі Філарэтам узведзены ў сан протаіерэя.

Пастырскую працу сумяшчаў з выкладчыцкай дзейнасцю: чытаў курс асноў Праваслаўя на факультэце тэалогіі Еўрапейскага гуманітарнага ўніверсітэта г. Мінска, нёс послух па арганізацыі працы нядзельнай школы пры храме, апецы над інтэрнатам састарэлых і інвалідаў.

3 студзеня 1996 г. Высокапраасвяшчэнным мітрапалітам Філарэтам ў Свята-Успенскім Жыровіцкім манастыры пастрыжаны ў манаства з імем у гонар Арцемія, велікамучаніка Антыяхійскага.

8 студзеня 1996 г. узведзены ў сан архімандрыта.

4 лютага 1996 г. у Свята-Духавым кафедральным саборы г. Мінска мітрапалітам Мінскім і Слуцкім, Патрыяршым Экзархам усяе Беларусі Філарэтам у саслужэнні членаў Сінода Беларускай Праваслаўнай Царквы хіратанісаны ў епіскапа Гродзенскага і Ваўкавыскага.

З 1997 па 1998 гг. епіскап Арцемій з'яўляўся старшынёй савета Цэнтра праваслаўнай асветы ў імя прападобнай Еўфрасінні Полацкай.

Епіскап Гродзенскі і Ваўкавыскі Арцемій з'яўляецца старшынёй Аб'яднання моладзі Беларускай Праваслаўнай Царквы. У адпаведнасці з пасадай курыруе праваслаўны моладзевы рух у Беларусі. Аб'яднанне моладзі Беларускай Праваслаўнай Царквы і яго старшыня ў 2004 годзе сталі лаўрэатамі прэміі III Фестываля праваслаўнай моладзі «Знойдзенае пакаленне», які прайшоў з 5 па 6 верасня 2004 г. у Маскве.

9 верасня 2004 г. пастановай рады Мінскай духоўнай акадэміі імя свяціцеля Кірыла Тураўскага епіскапу Арцемію нададзена вучоная ступень кандыдата багаслоўя за дысертацыю на тэму «Уводзіны ў праваслаўнае багаслоўе».

У 2006 годзе паступіў у Хрысціянскую тэалагічную акадэмію г. Варшава (Рэспубліка Польшча). Пасля заканчэння курса ў 2007 годзе пастановай рады акадэміі ўладыку Арцемію прысвоена ступень магістра багаслоўя за дысертацыю на тэму: «Праблемы выкладання прадмета «Катэхізіс» у краінах былога Савецкага Саюза».

Епіскап Гродзенскі і Ваўкавыскі Арцемій з'яўляецца дацэнтам кафедры біблеістыкі і хрысціянскага веравучэння Інстытута тэалогіі Беларускага дзяржаўнага ўніверсітэта (правапераемнік факультэта тэалогіі ЕГУ).

Адукацыя:

2007 г. — Хрысціянская тэалагічная акадэмія г. Варшавы (магістр багаслоўя). 

Епархія: Гродзенская і Ваўкавыская епархія

(Правячы архіерэй)

 Узнагароды:

Царкоўныя:

  • 2012 г. — ордэн свц. Інакенція Маскоўскага II ст.;
  • ордэн прп. Сергія Раданежскага II ст.;
  • ордэн прп. Еўфрасінні Полацкай;
  • ордэн св. дабравернага князя Данііла Маскоўскага II ст.

Web-сайт:

www.orthos.org