Пошук

Выйшла кніга пра малавывучаны перыяд гісторыі Мінскай епархіі

07 сакавіка 2019

Выдавецтва «Медыял» выпусціла кнігу архімандрыта Сергія (Брыча) «Мінская епархія ў 1959 годзе».

Пры напісанні кнігі аўтар звярнуўся да выяўленага ім у архіве Свята-Духава кафедральнага сабора горада Мінска рукапісу справаздачы аб жыцці Мінскай епархіі ў 1959 годзе, падрыхтаванай мітрапалітам Мінскім і Беларускім Гурыем (Ягоравым).

Прыводзяцца дадзеныя аб стане спраў у Мінскім епархіяльным упраўленні, аб колькасці храмавых будынкаў, якія выкарыстоўваюцца Праваслаўнай Царквой і з'яўляюцца помнікамі архітэктуры, паведамляюцца статыстычныя дадзеныя аб колькасці прыходаў, манастыроў, святароў, манаскіх асоб, характарызуецца стан рэлігійна-маральнага жыцця праваслаўных вернікаў, апісваюцца важнейшыя падзеі царкоўна-грамадскага жыцця, дзейнасць кіраўніка епархіі, стан і вынікі рамонтна-будаўнічых работ, жыццё Мінскай духоўнай семінарыі.

Аўтар упершыню ўводзіць у навуковы абарот тэкст епархіяльнай справаздачы за 1959 год, пры публікацыі якой захоўваюцца ўласнаручныя праўкі мітрапаліта Гурыя ў машынапісным тэксце, якія адлюстроўваюць асабістае стаўленне архіпастыра да цэлага шэрагу пытанняў царкоўнага жыцця.

У кнізе змешчаны ўнікальныя фотаздымкі з архіва Свята-Духава кафедральнага сабора горада Мінска.

Выданне прызначана даследчыкам гісторыі Беларускай Праваслаўнай Царквы, аспірантам, студэнтам духоўных і свецкіх навучальных устаноў, усім, хто цікавіцца гісторыяй Беларусі.

Church.by