Прэзідэнт Беларусі наведаў Лядзенскі манастыр

19 красавіка 2020

top.jpgПрэзідэнт Беларусі Аляксандр Лукашэнка ў свята Вялікадня запаліў свечку ў Свята-Благавешчанскім Лядзенскім храме ў Смалявіцкім раёне.

На Вялікдзень у адрозненне ад калядных свят Аляксандр Лукашэнка звычайна наведвае невялікія цэрквы. Як правіла, яны размешчаны за межамі сталіцы.

Свята-Благавешчанскі Лядзенскі храм знаходзіцца на тэрыторыі мужчынскага манастыра ў гонар Благавешчання Прасвятой Багародзіцы ў вёсцы Малыя Ляды. Кіраўнік дзяржавы прыехаў у царкву разам са сваім малодшым сынам Мікалаем. Коратка паразмаўляўшы з прыхаджанамі, Прэзідэнт запаліў свечку і павіншаваў вернікаў са святам Вялікадня.

Аляксандр Лукашэнка адзначыў, што Вялікдзень адкрывае серыю добрых і светлых, неаспрэчных свят. Ён падзякаваў прыхаджанам за тое, што, нягледзячы на «нагнятанне сітуацыі» ў грамадстве, яны ўсё ж прыйшлі ў храм. «Беларусы проста малайцы — без панікі, без гвалту. Каму трэба паберагчыся — той сябе беражэ, застаецца дома або проста выйдзе адзін дзе-небудзь, з роднымі падыхае свежым паветрам. Хто мацнейшы, выпрацаваў імунітэт — той смялейшы і ў храмы прыходзіць», — адзначыў Прэзідэнт.

З храма Кіраўнік дзяржавы павіншаваў усіх беларусаў з Вялікаднем, паводле яго слоў, самым светлым святам у жыцці. «Як бы ні было ў нашай гісторыі, ніхто не змог закрыць, прыкрыць, забараніць гэта свята, — падкрэсліў ён. — Я заўсёды прыходзіў і буду прыходзіць у храм. Як бы ні складваліся абставіны, гэта святое. Гэта прынцып майго жыцця. Хачу, каб і вы кіраваліся самымі добрамі і светлымі прынцыпамі. І тады Ён, убачыўшы гэта, абавязкова дапаможа».

Аляксандр Лукашэнка перадаў словы падтрымкі расіянам і ўкраінцам, якія таксама змагаюцца з пандэміяй. «Яны, як і мы, перажываюць няпросты час. Можа, у іх сёння нават складаней, чым у нас. Хачу ад усіх беларусаў пажадаць ім здароўя. Я хачу, каб Гасподзь пачуў і дапамог ім пераадолець гэту бяду, часта створаную намі самімі. Няхай нашы браты жывуць у міры і згодзе», — сказаў Прэзідэнт.

Кіраўнік дзяржавы таксама пажадаў хутчэйшага выздараўлення палякам, літоўцам і латышам, жыхарам іншых еўрапейскіх краін, амерыканцам і грамадзянам КНР.

У храме Аляксандру Лукашэнку ўручылі копію цудатворнага візантыйскага абраза «Заступніца». Ён выкананы на палатне з прымяненнем унікальнай тэхналогіі, якая дазваляе перадаць якасную шаўкаграфію ручной працы.

У адказ Прэзідэнт перадаў храму абраз «Уваскрэсенне Хрыстова. Ангел ля Гроба Гасподняга». Абраз адлюстроўвае сюжэт, апісаны ў кананічных тэкстах: «Яўленне ангела жанчынам-міраносіцам». Ён стаў самым раннім ўвасабленнем вобраза Уваскрасення і быў вядомы яшчэ ў IV стагоддзі. Абраз выкананы ў тэхніцы васковай тэмперы. Яго аўтар — іканапісец Андрэй Жараў..

Афіцыйны партал Прэзідэнта РБ / Сhurch.by