Афіцыйны партал
Беларускай Праваслаўнай Царквы

Архіепіскап Гомельскі Сцяфан узначаліў Літургію пад адкрытым небам на месцы былога Макар'еўскага манастыра

21 мая 2019

Малітоўны ўспамін подзвігу свяшчэннамучаніка Макарыя, мітрапаліта Кіеўскага, адбыўся 18 мая ў Гомельскай епархіі.

У гэты дзень архіепіскап Сцяфан узначаліў саборнае служэнне Літургіі пад адкрытым небам, якому папярэднічаў хрэсны ход да месца былога Макар'еўского манастыра.

За богаслужэннем маліліся ігуменні манастыроў Гомельскай епархіі: Іаана (Ярэц) з сёстрамі Успенскага жаночага манастыра вёскі Казімірава, Вера (Афонькіна) з сёстрамі Ціхвінскага жаночага манастыра горада Гомеля і манахіня Архелая (Новікава) з сёстрамі Іаана-Кармянскага жаночага манастыра вёскі Карма.

Богаслужэбныя спевы выканаў хор Нікольскага манастыра горада Гомеля сумесна з духавенствам епархіі пад кіраўніцтвам рэгента Алены Бачкаровай.

Пропаведзь пасля запрычаснага верша прамовіў настаяцель храма свяшчэннамучаніка Аляксія Лельчыцкага ў горадзе Гомелі протаіерэй Аляксандр Лапушанскі.

Падчас Літургіі былі ўзнёсены малітвы аб міры на Украіне і вечная памяць пацярпеўшым у часы ганенняў за веру Хрыстову.

У пропаведзі па заканчэнні богаслужэння архіепіскап Гомельскі і Жлобінскі Сцяфан адзначыў:

— Калісьці тут быў вялікі манастыр, у якім гарэла яркім агнём свечка хрысціянскай веры, у якім цякло жыццё і была сувязь з Богам. Наша місія як сапраўдных вернікаў — ніколі не забываць пра мінулае гэтага месца. Сёння мы аддаём даніну памяці не толькі гэтаму храму, але і свяціцелю Макарыю Кіеўскаму, які пад катаваннямі не здаўся ворагу і панёс мучаніцкую смерць.

Уладыка узнёс малітву свяшчэннамучаніку Макарыю Кіеўскаму, павіншаваў усіх прычаснікаў з прыняццем Хрыстовых Тайн і ў памяць аб гэтым дні раздаў усім багамольцам абразкі.

Па заканчэнні богаслужэння ўсе жадаючыя маглі паўдзельнічаць у экскурсіі па тэрыторыі былога манастыра, якую правёў протаіерэй Аляксандр Лапушанскі. Святар азнаёміў гасцей з уладкаваннем манастыра і манаскага жыцця.

Гомельская епархія / Church.by