Ва ўрочышчы Курапаты малітоўна памянулі ўсіх нявінна забітых у Айчыне нашай
01 лістапада 2017
29 кастрычніка 2017 года, у дзень Сабора навамучанікаў і вызнаўцаў зямлі Беларускай, веруючыя мінчане ўшанавалі памяць усіх нявінна забітых і пахаваных ва ўрочышчы Курапаты.
Паніхіду здзейсніў настаяцель прыхода храма Успення Найсвяцейшай Багародзіцы ў вёсцы Цна іерэй Адрыян Латушка.
У пропаведзі айцец Адрыян адзначыў важнасць малітоўнага памінання людзей, якія пралілі ў гэтым месцы сваю кроў.
Памінальныя набажэнствы праходзяць у Курапатах намаганнямі маладога Успенскага прыхода і яго настаяцеля іерэя Адрыяна Латушкі. Сам прыход знаходзіцца ў вёсцы Цна, жыхары якой былі непасрэднымі сведкамі масавых расстрэлаў, якія праходзілі ва ўрочышчы Курапаты ў канцы трыццатых – пачатку саракавых гадоў.
Цяперашняя паніхіда прайшла на наступны дзень пасля Дзмітраўскай бацькоўскай суботы – дня, калі ў Праваслаўнай царкве традыцыйна здзяйсняецца асаблівае памінанне памерлых. Гэтая паніхіда не першая – па благаславенню мітрапаліта Мінскага і Заслаўскага Паўла кожны год на Раданіцу і ў Дзмітраўскую суботу вернікі збіраюцца на памінальную малітву ў Курапатах. Паніхіды праходзяць у самым цэнтры ўрочышча, каля памятнага каменя.
Афіцыйны партал Беларускай праваслаўнай Царквы
© Беларуская Праваслаўная Царква 2019
Пры перадруку матэрыялаў спасылка на church.by абавязковая.
Калі вы хочаце задаць пытанне ці выказаць свае меркаванне з нагоды сайта або артыкулаў,
напішыце нам, скарыстаўшыся паштовай формай.
