У Мінскай духоўнай акадэміі адбылася штогадовая Міжнародная навуковая канферэнцыя

09 лістапада 2020

top.jpg

5 лістапада 2020 года ў Мінскай духоўнай акадэміі адбылася V Міжнародная навуковая канферэнцыя «Царкоўная навука ў пачатку трэцяга тысячагоддзя: актуальныя праблемы і перспектывы развіцця».

Форум з'яўляецца адным з важнейшых навуковых мерапрыемстваў, якія штогод арганізуюцца ў Мінскай духоўнай акадэміі.

Сёлета ўдзельнікамі канферэнцыі сталі выкладчыкі, аспіранты, магістранты і студэнты духоўных і свецкіх навучальных устаноў. Акрамя прадстаўнікоў акадэміі, з навуковымі дакладамі выступілі прадстаўнікі Інстытута прыкладной фізікі НАН Беларусі (Мінск), Інстытута гісторыі НАН Беларусі (Мінск), Нацыянальнага даследчага Інстытута сусветнай эканомікі і міжнародных адносін імя Я. М. Прымакова Расійскай акадэміі навук (Масква), Агульнацаркоўнай аспірантуры і дактарантуры (Масква), Маскоўскай духоўнай акадэміі (Сергіеў Пасад), Беларускага дзяржаўнага ўніверсітэта (Мінск), Акадэміі Міністэрства ўнутраных спраў Рэспублікі Беларусь (Мінск), Інстытута тэалогіі імя святых Мяфодзія і Кірыла Беларускага дзяржаўнага ўніверсітэта (Мінск), Інстытута менеджменту і турызму (Мінск), Гомельскага дзяржаўнага ўніверсітэта імя Францыска Скарыны (Гомель), Брэсцкага дзяржаўнага ўніверсітэта імя А. С. Пушкіна (Брэст), Брэсцкага дзяржаўнага тэхнічнага ўніверсітэта (Брэст), Мінскай духоўнай семінарыі (Жыровічы), Нацыянальнага архіва Рэспублікі Беларусь (Мінск).

Агульная колькасць заяўленых дакладчыкаў склала 57 чалавек.

Адкрыў працу канферэнцыі рэктар Мінскай духоўнай акадэміі архімандрыт Сергій (Акімаў), які распавёў аб традыцыях навуковага жыцця акадэміі і пажадаў удзельнікам поспехаў.

Прарэктар па навуковай рабоце Мінскіх духоўных акадэміі і семінарыі А. В. Слесараў распавёў аб парадку правядзення форуму і выступіў мадэратарам пленарнага пасяджэння.

Першым дакладчыкам на пленарным пасяджэнні стаў старшы выкладчык кафедры біблеістыкі і багаслоўя іерэй Міхаіл Самкоў, які выступіў з паведамленнем на тэму «Выкарыстанне прынцыпаў тэорыі рэлевантнасці пры экзэгезе біблейскіх тэкстаў».

Выкладчык Інстытута тэалогіі БДУ і Мінскай духоўнай семінарыі ігумен Ермаген (Панасюк) агучыў даклад «Крытыка А. Ф. Лосевым пазітывізму».

Выкладчык Мінскай духоўнай акадэміі і Мінскай духоўнай семінарыі протадыякан Павел Бубноў прадставіў даклад «Датаванне пачатку царкоўнага і манастырскага жыцця ў Жыровічах у крыніцах, гістарычным наратыве і гістарыяграфіі».

Пасля агульнага фота ў акадэмічным храме праца канферэнцыі прайшла ў секцыях «Актуальныя праблемы сучаснай біблістыкі і багаслоўя», «Актуальныя праблемы гісторыі Рускай Праваслаўнай Царквы ў XVI-XIX стагоддзях», «Актуальныя праблемы гісторыі Рускай Праваслаўнай Царквы ў XX стагоддзі», «Актуальныя праблемы сучаснага рэлігіязнаўства» і «Актуальныя пытанні царкоўна-практычных дысцыплін». Праца тэматычных секцый праводзілася пад кіраўніцтвам выкладчыкаў Мінскай духоўнай акадэміі.

Практычным вынікам праведзенага форуму стане выданне зборніка матэрыялаў, выпуск якога запланаваны ў выдавецтве Мінскай духоўнай акадэміі.

МінДА / Church.by