У вёсцы Заходы Шклоўскага раёна асвечаны храм

06 кастрычніка 2017

dsc002.jpg

3 кастрычніка 2017 года епіскап Магілёўскі і Мсціслаўскі Сафроній здзейсніў чын вялікага асвячэння храма ў гонар свяціцеля Мікалая, архіепіскапа Мір Лікійскіх, цудатворца, у вёсцы Заходы Шклоўскага раёна. Пасля асвячэння ў новым храме была здзейснена першая Бажэственная літургія.

Для ўдзелу ў гэтым богаслужэнні на Магілёўскую зямлю прыбылі высокія госці са Святой Гары Афон і з Малдаўскай Праваслаўнай Царквы: настаяцель афонскага манастыра Пантакратар архімандрыт Гаўрыіл і настаяцель Свята-Уладзімірскага манастыра ў горадзе Кішынёве архімандрыт Нектарый (Герман).

Айцец Нектарый па благаславенню мітрапаліта Кішынёўскага і ўсяе Малдовы Уладзіміра прывёз для пастаяннага знаходжання ў Нікольскім храме каўчэг з часціцай мошчаў свяціцеля Мікалая Цудатворца.

Яго Праасвяшчэнству таксама саслужылі: сакратар Магілёўскага епархіяльнага ўпраўлення протаіерэй Генадзь Пацэвіч, протаіерэй Мікалай Жук, протаіерэй Уладзімір Рыбакоў, благачынны Шклоўскай акругі протаіерэй Андрэй Рыбакоў і протадыякан Пётр Жук.

Богаслужэбныя спевы выканаў хор пад кіраўніцтвам Галіны Глушаковай.

У храме прысутнічалі: кіраўнік спраў Шклоўскага раёна Вадзім Васільевіч Рагавой і старшыня Шклоўскага раённага савета народных дэпутатаў Аляксандр Віктаравіч Давыдовіч.

Па заканчэнні Літургіі епіскап Сафроній павіншаваў усіх прысутных з набыццём новага храма, падзякаваў айцу Гаўрыілу і айцу Нектарыю за візіт, сумесную малітву і паднесеную ў дар святыню.

Было абвешчана мнагалецце, пасля чаго епіскап уручыў узнагароды ўсім актыўна папрацаваўшым пры стварэнні храма. Архіпастыр асабліва падзякаваў кцітару храма Мікалаю Мікалаевічу Грышкуну, уручыўшы яму ордэн свяціцеля Кірыла Тураўскага, а таксама протаіерэю Андрэю Рыбакову, які нёс асноўную працу па будаўніцтве і аздабленню Мікольскай царквы.

Скончылася ўрачыстасць сумеснай святочнай трапезай, дзе вернікі змаглі ў нефармальнай абстаноўцы паразмаўляць з правячым архіерэем.

Магілёўская епархія / Church.by