Старшыня Сінадальнага аддзела Беларускай Праваслаўнай Царквы па дабрачыннасці прыняў удзел у святкаванні Міжнароднага дня Чырвонага Крыжа

10 мая 2018

top.jpg

8 мая старшыня Сінадальнага аддзела Беларускай Праваслаўнай Царквы па дабрачыннасці і сацыяльнаму служэнню протаіерэй Кірыл Шолкаў прыняў удзел ва ўрачыстых мерапрыемствах, прысвечаных Міжнароднаму дню Чырвонага Крыжа і Чырвонага Паўмесяца.

У гэты дзень адбылося адкрыццё месячніка Чырвонага Крыжа і ўшанаванне валанцёраў, дзейнасць якіх накіравана на аказанне дапамогі ўразлівым катэгорыям грамадзян.

Таксама ў рамках сустрэчы адбылося афіцыйнае адкрыццё фотавыставы «У імя міласэрнасці», прысвечанай службе сясцёр міласэрнасці Беларускага Таварыства Чырвонага Крыжа і Міжнароднаму дню медыцынскай сястры. Экспазіцыя дзейнічае на тэрыторыі Музея гісторыі беларускага кіно.

Удзельнікам праграмы быў паказаны фільм Аляксандра Цярэшчанкі «Зіма пройдзе». У ім распавядаецца пра дзеючую медыцынскую сястру міласэрнасці Беларускага Таварыства Чырвонага Крыжа Ніну Мікалаеўну Блізнюк, якая была ўдастоена медаля імя Флорэнс Найтынгейл.

Дыяканія.by / Church.by